VIGAN CITY- Natay iti dati a miembro ti Philippine Army gapu iti panangpaltog kenkuana iti nakainuman na idiay Brgy. Callitong, Burgos, Ilocos Sur.
Nabigbig ti biktima a ni Jerry Valdez, 56, idinto a ti suspek ket ni Wilven Gayao , naasawaan agpada a taga Brgy. Callitong, Burgos.
Segun kenni P/Insp. Chris Alon, hepe ti PNP- Burgos , agin-inom dagiti dwa iti pagtaengan ti suspek iti nasao a barangay kadwa da dagiti gagayyem da idi adda iti saan da a nagkinnaawatan a nakapongtotan ti suspek.
Gapu iti dayta ket innala ti suspek ti paltog na sa na pintalugan ni Valdez a nakatamaan ti makinkannigid a barokong ken luppo a puon iti nakatayanna .
Boluntaryo a simmuko ti suspek kadagiti kameng ti PNP-Sta. Maria sumagmamano nga oras kalpasan a naglibas.
