VIGAN CITY – Sapsapulen dagiti otoridad ni dati a Cabugao Vice Mayor Deogracias Jose Victorino Savellano nga agtawen ti dua pulo ket walo, baro nga agnaed idiay Rizal, Cabugao gapu iti mapapati a panagpaputok na iti paltog, panagkabil, grave threat ken panagdadael na iti alikamen idiay barangay road ti Turod Patac, Cabugao idi kalman.
Maibasar iti report ti Cabugao municipal police station, inreport kadakuada ni Barangay chairman Edgardo Garma Sonido a kinabil ni Savellano ti maysa kadagiti BPAT member ti barangay Turod Patac ket pinaputukan na pay ti chainsaw ti maysa pay a lalaki.
Idi ala una baente ti malem idi kalman, agtaktakder ni Virgilio Sardeng nga agtawen ti lima pulo ket maysa, balo, maysa a BPAT member idiay Turod Patac idi limmabas ni Savellano ket sinipat na iti akin-kannigid a pingping ni Sardeng babaen iti mapapati a caliber 45 a paltog iti awan aniyaman a rason ket pinaputukan na iti chainsaw ni Rodolfo Sortido nga agtawen ti lima pulo ket lima isu a nadadael.
Ti agdama, manarimaan iti naun-uneg nga imbestigasyon dagiti otoridad inaig iti nasao a pasamak.
