Naituding ti panangipila ni dati a Senador Antonio Trillanes IV iti baro manen a kaso kontra kadagiti 18 a dati a suldado ken dadduma pay.
Dayta ket gapu iti pannakairaman ti nagan ni Trillanes a mapapati a nakaawat iti $2 million manipud ken ni dati a Rep. Zaldy Co para iti operasion ti International Criminal Court.
Iti pannaki-uman ti Bombo Radyo Vigan ken ni Trillanes, awan ti kinapudno ti nasao a banag ta dagitoy ket nalawag a pangdadaelda laeng kenkuana isu nga ad-adalen ti abogadona dagiti kaso a mabalin pay a maipila ta ibilangna a saan nga ang-angaw ti inaramidda.
Kinarit ti dati a senador dagiti mangpabpabasul kenkuana a no pudno a naturedda ket sangwenda dagiti kaso nga impilana ken mangipakitada iti ebidensia.
Kabayatanna, innayonna pay a saanton a maklaat no kadagiti sumarsaruno nga aldaw ket adda mangaklun nga adda nabayadan kadakuada.
Maipalagip a nangipila ni Trillanes iti kaso a perjury kontra kadagiti 18 a nagpabigbig a suldado ken cyberlibel met kontra kada Atty. Levito Baligod, dati a Cong. Mike Defensor, dati a broadcaster Jay Sonza, dati nga NTF-ELCAC spokesperson Lorraine Badoy, ken vlogger Cathy Binag.
