Nakasublin iti Pilipinas ni dati a Negros Oriental Rep. Arnolfo “Arnie Teves Jr. a mapapati a mastermind iti panangpapatay ken ni daydi Negros Oriental Gov. Roel Degamo kalpasan nga indeport dagiti otoridad idiay Timor-Leste a nagkiddawanna ti asylum.
Nag-landing ti PAF C295 aircraft a nagluganan ni Teves manipod Timor-Leste idiay Davao City iti alas syete kuarenta idi rabii para ti stopover ken nag-landing met laeng iti Villamor Air Base idiay Pasay City iti alas onsen idi rabii.
Manipod Villamor Air Base ket naipan iti National Bureau of Investigation (NBI) headquarters idiay Manila a dimmalananna ti booking procedure ken medical examination.
Immunan a pinasingkedan ni Justice Secretary Jesus Crispin Remulla a maidetain iti maysa kadagiti pasilidad iti National Bureau of Investigation kagiddan ti danag para ti kinatalgedna.
Ti dati nga agpampanday linteg ket sumangsango ti kaso a murder, frustrated murder ken attempted murder maipanggep ti pannakapapatay daydi Governor Degamo ken sangapulo pay a tattao idi March 4, 2023 iti Degamo residence idiay Pamplona, Negros Oriental.
Kabayatanna, maladingitan ni Atty. Ferdinand Topacio a legal counsel ni Teves ta saan a napalubosan a makasaritana ti kliyentena iti isasangpetna.
Segun ken ni Atty. Topacio, ingkari ni Director Jaime Santiago iti NBI nga apaman a makasangpet ni Teves iti Villamor ket makasaritana dagiti abogadona ngem inamin ti maysa nga Air Force personnel a nakapanawen da Teves iti airbase.
