Inlawlawag ti dati a mayor iti ili ti Burgos a dandanin malpas ti rangtay idiay Arsadanan Falls, Lubing, Burgos, Ilocos Sur kabaliktad iti nag-viral a video a nadadael ken saan a mabalin a pagnaan dagiti umili gapu iti natudo a panniempo.
Iti pannaki-uman ti Bombo Radyo Vigan ken ni dati a Burgos Mayor Nathaniel “Boy” Escobar, idi nabuyana iti video ket saanna a naliklikan a nasakitan ta idi terminona a narugian ti pannakaaramid ti proyekto.
Inlawlawagna a ti nasao a proyekto ket saan a kukua iti gobierno probinsia nu diketdi manipod iti RA 7171 ta kalikagumda a pasayaaten ti dalan a pagnaan dagiti agnaed ken uray dagiti taga-Abra.
Kalikagumna kadagiti umili a pasyaren iti lugarda tapno makita iti pudno a langana itatta ta ti nakitada a video iti social media ket nabayagen.
Nupay kasta ket pagyamanna latta a nagwaras iti video tapno maipakaammo iti publiko a dandanin a malpas iti rangtay ken mabalinen a pagnaan tapno mapasyar iti lugarda.
Kabayatanna, inlawlawag met ti nagtaudan iti orihinal a video a ni Jhay Bobiles nga adda laeng iti nangireport iti video-na ket naaramat a pangdadael iti ili ti Burgos.
Segun ken ni Bobiles, awan iti intensyonna a mangdadael iti ili nu diketdi pakaammoan laeng dagiti umili a magmagna idi iti detour a saan a madalanan iti paset ti waig ngem mabalin a madalanan ti rangtay para kadagiti nakamotorsiklo.
Kinunana a Hulyo pay laeng idi in-post na iti video isu a nakigtot laengen ta adda iti nagmensahe kenkuana a nangipakaammo nga adda iti nangala iti video-na ket trending a mainanaigen iti flood control projects.
Innayonna a saan a naipakada a maala kenkuana ti nasao a video nu diketdi naipost lattan ket idi pinatulodanna ti mensahe nga ikkaten ket saan nga agrepreply ti social media page.
Iti baet ti napasamak ket napalaus iti panagyaman ni Bobiles iti LGU Burgos ta nasimpan ti rangtay ket dakkel a tulong kadakuada nga umili tapno nadaras iti panagdalyasatda iti nasao a lugar.
