VIGAN CITY – Nakemmeg ni Armando Garcia Tolentino, agtawen iti innem a pulo ket tallo, dati a Barangay Captain ken agnaed iti Barangay Magsaysay District, Santa gapu iti mapapati a panangipaturongna iti paltog kadagiti agga-ama.
Dagiti nagreklamo ket da Alex Basconcillo Rafanan, agtawen iti limapulo ket lima, Barangay Kagawad; Jury Faye Rosely Rafanan Picoc, agtawen iti tallopulo ket maysa, HR Office Aide, ken maysa a menor de edad nga agtawen iti sangapulo ket innem, agpapada nga agnaed iti nasao a lugar.
Personal a naturong dagiti witness a da Dan Henley Barbosa Picoc, agtawen iti tallopulo ket maysa, sub-contractor ken ni Ruben Udarbe, agtawen iti innem a pulo, chief tanod nga agpada nga agnaed met laeng iti nasao a lugar kadagiti pannakabagi ti linteg tapno ireport ti pasamak iti barangayda.
Iti pannaki-uman ti Bombo Radyo Vigan ken ni PEMS Ryan Jay Quicho a Municipal Executive Senior Police Officer iti Santa Municipal Police Station, dagus a nagresponde dagiti pannakabagi ti linteg iti nasao a lugar ket idi makadanonda, nakalibasen ti suspek.
Segun kenkuana, napanda iti pagtaengan ti suspek ngem saanda a nadanon nupay kasta, adda iti nangipakaammo kadakuada nga adda isuna iti maysa a convenience store idiay Sitio San Jose, Barangay Magsaysay District, Santa.
Mapapati a naggapu ti suspek iti galyeraan a naka-inom iti arak ket intuloyna a naginom iti nasao a convenience store.
Kabayatanna, naipilan ti kaso ti dati a kapitan iti prosecutor para iti panaglabsingna ti grave threats ken panaglabsing ti Republic Act 10591.
