VIGAN CITY – Panagtalek iti bagi, saan a pananglipat iti Dios ken panangbuyog iti aramid ket saan laeng a sao ti nagbalin nga armas iti pananggun-odna iti arapaapna iti biag ni Pat. Gian Cedrick Lota Dispo, taga-Brgy. Ayusan Sur, Vigan City a naidestino ita idiay Dagupan City Police Station.
Iti pannaki-uman ti Bombo Radyo Vigan ken ni Dispo, panagilako iti nadumaduma a taraon kas ti fishball, mangga, balut, pandesal ken panagpukis ti nangidalan kenkuana a makaturpos iti panagadal ken agballigi iti biag.
Iti Lunes agingga Biernes ket parbangon nga agririing ni Dispo ket sakbay a mapan agbasa, agluto pay iti pandesal nga apanna ilako iti alas kuatro iti agsapa ta ti malakoanna ket igatangnanto manen ti balut nga ilakona.
Iti Sabado, isu ti panagbalinna a bouncer iti Vigan City Heritage idinto nga iti Dominggo ket aldawna met nga agpukis, agdalus ken agluto iti simrekanna a restaurant.
Grade 2 pay laeng idi ket napadasnan ti agraep, aggabut ken agilako iti nateng ta daytoy ti nakaimulagatannan a klase ti panagbiag.
Idi met hayskul ket igidgiddanna ti agklase ken agpukis ta ti tangdanna ket aramatenna a pag-research kadagiti assignment-na.
Iti agdama, itultuloy latta ni Dispo ti panagpukisna ta kalaksidan iti sueldona ita kas maysa a police officer ket isu pay ti pangnaynayunna iti ipatpatulodna iti pamiliana.
2019 idi nakapagturpos isuna iti kurso a Bachelor of Science in Criminology iti University of Northern Philippines ket kalpasan dagiti linasatna a training ket nagun-odnan ti arapaapna kas maysa a pulis.