Nakigtot ni dati a Finance Secretary ken Bangko Sentral ng Pilipinas (BSP) Monetary Board Member Benjamin Diokno idi naammoanna a maar-aramat ti “leadership funds” tapno pondoan dagiti flood control projects.
Inlawlawag ni Diokno a ti maaw-awagan a leadership funds ket adda pakainaiagan dagiti lider iti dua a biang iti kongreso.
Kinunana a no bicam, ti sumangsango iti dayta ket ti chairman ti House Appropriations Committee ken ti Finance Committee iti Senado ngem ita ket kasla nasukatan ti pagannurotan ta karamanen a kanayon ti Senate president ken House Speaker.
Ti sarita ni Diokno ket kasaruno iti testimonia ni dati a Department of Public Works and Highways Secretary Manuel Bonoan iti Sandiganbayan nga amin a senador idi napalabas a Kongreso ket nakawat iti saan a nababbaba iti P500 million manipod iti leadership fund nga inlatang ti Department of Public Works and Highways (DPWH) iti salinong ti 2025 budget.
Kinuna ni Bonoan a ti leadership funds ket adda alokasyon iti national budget a maar-aramat para kadagiti priority infrastructure projects dagiti senador.
Inamin met ni Diokno a posible nga adda nagbalin nga amendment iti panagaramat ti leadership funds idi napalabas a Kongreso a saanna a personal nga ammo.
