VIGAN CITY – Nabuy-bust ni Remedios Eulogia Sayo Baclig, agtawen iti limapulo ket dua a taga-Pug-os, Cabugao, Top 10 Priority target ken High Value Individual iti Provincial level.
Iti pannaki-uman ti Bombo Radyo Vigan ken ni PMaj. Franco Catalan iti Cabugao Police Station, datin a drug surrenderer ti suspek ket arigna isunan ti nangituloy ti iligal nga aramid ti manongna a naibilang a regional target ken nakemmeg idi napan a tawen.
Naala iti suspek ti maysa a small heat sealed transparent plastic sachet ti shabu a nagserbi a buy bust item, maysa a small heat sealed transparent plastic sachet ti shabu nga ikotna nga agdagsen iti 1.5 gram ken aggatad iti sangapulo a ribo a pisos.
Malaksid ti dayta, adda pay naala nga improvised lighter, pagkilwan, glass tube, cellphone, sangaribo a pisos a buy bust money ken innem a piraso ti sangaribo a pisos a boodle money.
Addan iti kustodia dagiti kapulisan ti suspek ket sangwenna ti kaso a panaglabsing iti Republic Act 9165 wenno Comprehensive Dangerous Drugs Act of 2002.
