Nakemmeg ti maysa nga Street Level Individual babaen iti naiwayat a search warrant operation idiay Barangay San Vicente, Magsingal, Ilocos Sur.
Ti suspek ket nabigbig iti alyas Rocky, agtawen iti uppat a pulo ket walo,taga-Tolentino Street, Barangay San Vicente, Magsingal.
Iti pannaki-uman ti Bombo Radyo Vigan ken ni PLT. Richard Pajo, dati a drug surrenderee ti suspek idi 2016 ngem idi napakaamoanda a sinublianna ti iligal nga aramidna a panagilako iti iligal a droga ket sinipsiputanda agingga a naiwayat ti operasyon.
Ginandat ti suspek ti aglibas idi maiwayat ti operasyon ngem nalapdan dagiti pannakabagi ti linteg.
Naala manipud iti operasyon ti uppat a heat sealed transparent plastic sacher a naglaon iti mapapati a shabu a nasurok kumurang 0.8 grams nga aggatad iti P5,440; dua nga improvised scoop ti mapapati a shabu residue; tallo a heat sealed transparent plastic sachet a naglaon iti white crystalline substance a nasurok kumurang 0.7 grams nga aggatad iti P4,760; maysa nga improvised glass tooter a naglaon iti mapapati a shabu residue; dua a nalukatan a transparent plastic sachet a naglaon iti mapapati a shabu residue; maysa nga improvised straw scoop a naglaon iti mapapati a shabu residue; ken improvised glass tooter a naglaon iti shabu residue.
1.5 grams ti pakabuklan dagiti nakumpiskar a drug items nga aggatad amin iti P10,200.
Malaksid dayta, naala pay dagiti dadduma a drug paraphernalia ken pito a bala ti caliber 22.
