VIGAN CITY – Nasurok dua a lawas a sinipsiputan dagiti pannakabagi ti linteg ti Sto. Domingo Police Station ti maysa a lalaki a nabuy-bust idiay Brgy. Camestizoan.
Nabigbig ti suspek a ni Christopher Vagay, agtawen iti tallopulo ket maysa a taga-Immayos Norte, San Juan nga idiay ili ti Sto. Domingo ti pagilaklakoanna iti iligal a droga.
Iti pannaki-uman ti Bombo Radyo Vigan ken ni PLt. John John Garan, dati a drug surrenderee ti suspek ngem sinublianna ti iligal nga aramidna ken damona laeng ti matiliwan.
Naala manipud iti suspek ti maysa a heat sealed sachet ti shabu a naglaon iti shabu ken dua a heat sealed transparent plastic sachet ti shabu a naikabil iti pagyanan ti pusporo, sangaribo a pisos a marked money, cellphone ken sling bag.
Nupay kasta, naituding a dumalan iti drug examination ti suspek tapno maduktalan no agar-aramat iti iligal a droga ket iti agdama, nakakustodian kadagiti pannakabagi ti linteg tapno sangwenna ti kaso a panaglabsing iti Republic Act 9165 wenno Comprehensive Dangerous Drugs of 2002.
