VIGAN CITY – Agsusukot a kaso kas ti illegal discharge of firearms, grave threat, direct assault ken malicious mischief wennu panangdadael iti sanikua ti sangwen ti dati a bise mayor idiay Cabugao a ni Deogracias Jose Victorino Savellano nga agtawen ti dua pulo ket walo, baro nga agnaed idiay Rizal, Cabugao.
Dagiti nasao a kaso a naipila kontra kenkuana ket gapu ti mapapati a panangitungpa na iti paltog nga iggem na ken ni Virgilio Sardeng ken panangpalto-paltog na ti chainsaw ni Rodolfo Sortido idiay Turod Patac, Cabugao idi naminsan nga aldaw.
Sapsapulen pay laeng dagiti otoridad ti dati a bise mayor agsipud ta saan pay a nagparang idiay police station ta ipalawag na iti napasamak.
Kabayatanna, mabalin pay nga isanud dagiti biktima iti darum ken mangipila da ti affidavit of desistance nu la ketdi makapagpapatang da.
Mapapati a ti panangchainsaw ni Sortido ti kayo nga adda iti daga a kukua ti pamilya Savellano iti nakapungtotan ti dati a bise mayor.
