VIGAN CITY – Rinabiin a maipabuya ti Dancing Fountain show iti siudad ti Vigan sipud idi February 2 kalpasan ti pannakaisardengna idi kallabes tapno maliklikan ti panagadu dagiti tattao a mapan gapu ti Covid19.
Iti pannaki-uman ti Bombo Radyo Vigan ken ni Ilocos Sur Musical Dancing Fountain Management Head Dante Tacata, duapulo a minutos ti pannakaipabuya ti dancing fountain a marugian iti alas syete ti rabii ta pangpadpadasanda pay laeng sakbay a maisublinto ti regular a pannakaipabuyana.
Mayur-uray pay laeng dagiti Koreano nga umay mangsimpa iti dadduma a paset ti dancing fountain ta saanda a natuloy idi kallabes gapu ti panangsurotda iti protocol ti pagilianda.
Innayon ti opisial a nakadepende iti desisyon ni Gov. Ryan Singson no mamindua iti kada aldaw ti pannakaipabuya ti dancing fountain agsipud ta dakkel met a tulong iti industria ti turismo ditoy probinsia ken kadagiti bassit a negosyo.
Nupay kasta, naibilin kadagiti mapan agbuya a sumurotda iti safety protocol nangruna ti social distancing no addada iti dancing fountain area ken saan a mabalin nga umay dagiti ubing.
