Umaboten iti nasurok P3.5 billion ti gatad ti damage iti sektor iti imprastraktura gapu iti nagtipon nga epekto dagiti naglabas a bagyo ken habagat, kas maibasar iti listaan ti Office of the Civil Defense (OCD) itay bigat.
Karaman iti infrastructure damage ti ginasut a nalayos a lugar, kalsada, rangtay ken nasurok sangaribo a nadadael a pagtaengan iti agduduma a rehion, a ti 1,787 ti partially damages idinto a 206 iti totally damaged.
Ngimmato pay ti gatad ti danyos iti sektor iti agrikultura iti nasurok P1.4 billion.
Umaboten ti nasurok 5.3 million nga indibidual ti apektado ti didigra iti Ilocos Region, Cagayan Valley, Central Luzon, Bicol, Western Visayas, Zamboanga Peninsula, Calabarzon, CAR, Metro Manila ken Mimaropa.
Nakairekord met iti nasurok 42,000 nga indibidual ti naibakrit kadagiti evacuation center.
Iti agdama ket duapulo ket piton ti nairekord a natay idinto nga agtultuloy a masapsapul iti maysa a mapukpukaw.
