VIGAN CITY – Pinaglibakan ni Police Captain Arcadio Viloria ti Narvacan municipal police station nga adda ti maysa a balasitang a ngan-ngani a dinukot dagiti nakalugan ti puraw a van idiay Codoog, Narvacan. idi agsapa idi kalman.
Nadakamat ni Viloria nga adda iti naawat da a report inaig iti nasao a pasamak isu a nagresponde da nga insigida ngem idi nakadanun da iti lugar, awan iti nakita da a pagilasinan iti panagdukot agsipud ta ti nagkamangan da a lugar ket awanen iti sabali a lumsutan da nu saan da a manglikaw ken magna idiay ili.
Innayon ni Viloria nga idi nagsaludsudan da ti balasitang ket nadakamat na nga adda ti puraw a van a nasabat na idi mapan kuma agbasa ket sinenyasan da a sumurot kadakuada isu a nagtaray ngem saanen a sinurot pay dagiti nakalugan ti puraw a van.
Nagderetso ti nasao a van idiay Barangay Maruzo, Narvacan ngem mapapati a nagsubli met laeng ta awan iti rumuwaran da iti nasao a lugar.
Idi kalman, idi immatendar ti hepe iti sesyon ti konseho ti Narvacan, nadakamat na iti nasao a pasamak ket naidukit met ni Sangguniang Bayan Member Joven Angco nga idi agsapa idi kalman, December 3, napan idiay Barangay Maruzo a nakalugan ti puraw a van ta adda iti napan na intulod ket posible nga isu iti nagbiddutan da a kumaw agsipud ta ti oras a papan na ket isu met laeng iti oras nga inreport da kadakuada iti maatap a pannakapasamak iti panagdukot.
