Insingasing ni Parañaque 2nd District Rep. Brian Raymund Yamsuan ti nangatngato a benepisio ken proteksion para kadagiti barangay tanod nga inawaganna nga ‘unsung first responders’ iti panangpatalinaed ti kappia ken urnos iti komunidad.
Segun ken ni Yamsuan, napateg a maikkan iti Christmas bonus, libre a legal aid, ken dadduma pay a benepisio dagiti barangay tanod.
Nangipila ni Yamsuan iti House Bill No 6598 iti 20th Congress a ti gagemna ket mai-upgrade ti agdama a benepisio dagiti barangay tanod a nagserbin iti saan a nababbaba ngem maysa a tawen.
Karaman iti gakat ti Christmas bonus a saan a nababbaba ngem iti kagudwa ti maaw-awat ti kapitan, insurance coverage a 75 percent iti benepisio ti kapitan, libre a legal assistance ken pannakaipangrunada kadagiti livelihood ken developmental program.
