Dagiti barangay chairman ti Ilocos Sur, nadumaduma iti reaksyon da re: pannadutok ti OIC barangay leader

VIGAN CITY– Nagduduma iti reaksyon dagiti kapitan ti barangay iti probinsiya ti Ilocos Sur inaig iti posible a pannakaitantan ti barangay ken Snagguniang Kabataan eleksyon ken pannakadutok ti Officer-in-charge wenno OIC nga agbalin a lider iti barangay.
Segun kenni Brgy. Chairwoman Editha Dasalla ti Brgy. Baliw Daya, ili ti Sta. Maria, naragragsak no adda eleksyon tapn maikkan ti gundaway dagiti baro nga agserbi iti publiko.
Para met kenni Brgy. Capt. Nico Singson de Leon ti Brgy. VII, Vigan City, gapu ta isuna iti agdama a kapitan , rumuar laeng a “self-serving” no mangited isuna iti reaksyon.
Kabayatanna, segun kadagiti kapitan a saanen a nagpabigbig, sigurado a maproblemaan dagiti mayor wenno siasinoman nga appointing authority nangruna no ado dagiti asideg kenkuana.
Dagiti met dadduma ket inbaga da a napintas no adda appointed a barangay leader tapno saan nga aggastos para iti eleksyon.
Maipalagip nga inbaga ni Presidente Rodrigo Duterte a plano na nga itantan manen ti barangay election inton oktobre ken OIC laengen dagiti madutukan a lider ti barangay.