VIGAN CITY – Ipasardeng pay laeng ni Gov. Ryan Luis Singson dagiti nadumaduma nga event a maisayangkat ditoy probinsia tapnu maliklikan a maapektaran dagiti agindeg iti agraraira a coronavirus disease 2019 kas napagnunumuan idi kalman iti naisayangkat nga Inter-Agency Management Council nga indaulwan ti gobernador.
Nairaman pay a maipasardeng iti panagpabuya ti dancing fountain, ken ti bazaar a maisayangkat kuma tatta a bulan tapno maliklikan iti panagdudupudup dagiti tao a posible a mangitunda iti pannakaapektarda iti nasao a sakit.
Nu pay saan a kayat kuma ti gobernador nga ipatungpal dagiti nasao a banag, saan a mabalin ta masapul a suruten da iti bilin ni Presidente Rodrigo Duterte a liklikan pay laeng ti mapan kadagiti pampubliko a lugar no awan met ti napateg a papanan ken masapul a dagiti aggapu kadagiti pagilian nga apektado ti nasao a sakit ket dumalan iti quarantine.
Kabayatanna, iyur-uray da ti desisyon ti Department of Education no isapsapada ti graduation ceremony dagiti agad-adal ta ti latta Deped ti makaammo iti nasao a banag.
