VIGAN CITY – Daan a riri iti daga ti mapapati a rason ti napasamak a pammaltog idiay Barangay Rizal, Santa a nakapuntaan ti maysa nga agtawen-iti-walo nga ubing.
Nabigbig ti suspek a ni Fernando Bielza Saraos, agtawen iti limapulo ket innem, residente iti nasao a lugar ken sumangsango iti kaso a frustrated murder.
Iti pannaki-uman ti Bombo Radyo Vigan ken ni Police Captain Mark Bryan Corpuz, ti ama ti biktima ti mapapati a target ti suspek a pimmaltog ta adda nabayagen a ririda iti daga.
Maipalagip a ti biktima kadua ti amana ken dagiti dadduma pay ket nakalugan iti traysikel idi bigla a pinaltugan ida ti suspek.
Dagus met a timmaray nga immuneg iti pagtaenganda ti suspek idinto a dagiti pannakabagi ti linteg ket nangisayangkat met iti hot pursuit operation a nagresulta iti pannakatiliwna.
Malaksid dayta, ti met kalibre 45 a paltog a naaramat iti insidente ket insuko ti anak a lalaki ti suspek.
Iti agdama, natalgeden ti kasasaad ti biktima ken manarimaan ti panagpalaingna kalpasan a nagsagrap iti tama ti paltog ti akin-kannawan a takyagna.
