Impasigurado ni Department of Agriculture (DA) Secretary Francisco Tiu-Laurel Jr. iti publiko nga adda pay laeng umdas a bagas ti National Food Authority (NFA) kadagiti bodega tapno masuportaran iti agtultuloy a pannakapalawa ti Benteng Bigas Program iti nadumaduma a paset ti pagilian.
Kasaruno ti pammatalged ti pannakairusat ti programa a nalaka a bagas nangruna a nakalatang para iti sektor ti transportasyon a naisayangkat idi kalman, Setyembre 16, 2025.
Gagem ti programa a tulongan dagiti driver ken operator iti sektor ti transportasion babaen ti panangipaay iti nalaklaka a bagas.
Segun ken ni Laurel, nalawa pay laeng dagiti bodega ti NFA tapno maidulin a nasayaat dagiti bagas, ken nasken nga agtultuloy a mairuar dagiti stock tapno adda pagnaan dagiti bagas a magatang manipud kadagiti lokal a mannalon.
Target ti ahensia a makailako iti agarup maysa a tonelada a bagas iti inaldaw babaen ti Benteng Bigas Program, idinto a planona pay a palawaen ti nasao a programa tapno makalako iti tallo a tonelada a bagas iti kada aldaw inton Disyembre.
Inwaeagawag pay ni Sec. Tiu-Laurel, Jr. a dagiti bus ken taxi driver ti sumaruno nga umawat iti benepisio manipud iti Benteng Bigas Program inton Oktubre. Augie Arellano
