Inruar ni Agriculture Secretary Francisco Tiu Laurel Jr ti baro a pagannurotan a mangpapigsa iti proteksion ti pagilian kontra iti African Swine Fever ken masigurado a natalged ti panagangkat iti karne ti baboy iti salinong ti Administrative Circular No 12.
Paset daytoy iti national zoning plan-da para iti ASF recovery ken safe trade, segun iti nasao nga opisial.
Maipatpatungpal babaen iti nasao a pammilin ti regionalization ti ASF a mangbigbigbig kadagiti ASF free zone iti uneg dagiti pagilian a napalubosan nga agexport maibasar iti World Organisation for Animal Health standards.
Dagiti laeng pagilian nga adda Department of Agriculture accredited laeng ti mapalubosan nga ag-apply para iti ASF-free recognition a dumalan iti innem a bulan a technical review ti Bureau of Animal Industry.
