Nagballaag ti Department of Agriculture kontra kadagiti indibidual ken grupo a mangididiaya iti mapapati a bogus rice import allocation kasukat iti kuarta.
Segun ken ni Agriculture Secretary Francisco Tiu Laurel Jr., nakaawat isuna iti impormasion mainaig iti pannakaidiaya dagiti peke nga alokasion tapno mapalubosan dagiti sumagmamano nga importer nga agangkat iti bagas ita a bulan.
Innayonna a nalawag ti rice import moratorium ket agingga laeng katapusan ti Disyembre laeng, isu nga scam wenno peke ti damag nga agwarwaras mainaig iti rice import allocation.
Maibasar iti naawat nga impormasion ti opisina ti opisial, adda dagiti solicitation forms a maiwarwaras kadagiti dadduma a rice miller, importer, ken trader idiay Cebu a mangibagbaga a mabalin ti agangkat iti bagas inton Disyembre ken adda ti garantisado nga alokasion.
