Insardeng ti Department of Agriculture ti pangiruar iti sanitary ken phytosanitary import clearance para iti mackerel kalpasan a makaawatda iti report iti mapapati a saan a husto a deklarasion ken panangpuslit dagiti imported nga ikan kadagiti wet market.
Imbilin ni Agriculture Secretary Francisco Tiu Laurel Jr. ti pannakaipatungpal ti suspension iti salinong ti Department Circular 28.
Inlawlawag ti DA a saan a karaman iti suspension ti imported a mackerel a nailatang para iti canning.
Segun iti ahensia, amin nga imported a mackerel ket nasken a nalawag a namarkaan laeng para iti canning ket saan a mabalin nga ilako wenno ited kadagiti lokal a paggatangan.
Ti kaadu ti mabalin nga angkaten dagiti lisensiado nga importer ket maibasar iti beripikado a produksion ken tinawen a VATable sales tapno masigurado ti husto a pannakaaramat dagiti maang-angkat a produkto.
