Insanud pay laeng ti Department of Agriculture ti plano a panagangkat iti 250,000 metriko a tonelada ti ikan a naituding koma inton Agosto.
Segun ken ni Agriculture Secretary Francisco Tiu Laurel Jr., manamnama a marugian daytoy inton Oktubre wenno Nobyembre, kagiddan ti panangrugi ti closed fishing season.
Innayon ti DA nga agtalinaed a makanay ti suplay ti ikan gapu iti nabara a paniempo gapu iti El Niño a nangiyatiddug iti fishing season isu nga agtalinaed a natibker ti presio ti seafood.
Gagem ti panagangkat a masigurado a makanay ti suplay ken agtalinaed a nalaka ti presio ti ikan iti panawen ti fishing ban manipud Nobyembre agingga Pebrero, a panawen ti pannakaiparit ti panagkalap tapno makapagpaadu dagiti ikan.
Karaman kadagiti mabalin nga angkaten ti nadumaduma a klase ti ikan kas ti tuna, salmon, sardinas, pasayan, kappi, pusit, tahong, ken dadduma pay.
