Impasigurado ti Department of Agriculture nga awan ti pagkurangan iti bagas iti baet ti atiddug a pila kadagiti sumagmamano a rice mill idiay Bocaue, Bulacan.
Segun kadagiti importer, kaaduan kadagiti imported a bagas ket saan pay a simmangpet ta naikkat laeng ti ban iti panagangkat idi maudi nga aldaw ti 2025, ken ti simmangpet a bagas ket nabayag a nairuar manipud kadagiti pantalan.
Innayon ni Arnel de Mesa, pannakangiwat ti DA, natural laeng nga adda pila kadagiti rice mill bayat nga agtultuloy ti importasyon.
Idi Enero 22, umabot iti 248,000 a metric tons ti imported a bagas ti simmangpet iti pagilian.
Kabayatanna, ngimmato met iti 0.5 percent ti gatad ti agricultural output iti maikapat a quarter ti 2025, katukad iti 2.6 percent a panagpangato no ikumpara idi napalabas a tawen.
