“Nagsagana”, dayta iti inaramid ti maysa kadagiti nag-top 9 iti kalkalpas nga October 2024 Licensure Examination for Fisheries Professionals.
Iti pannaki-uman ti Bombo Radyo Vigan ken ni Katrina Malenab a taga-Mabilbila Sur, Santa, Ilocos Sur a nagturpos a Cum Laude iti Ilocos Sur Polytechnic State College – Narvacan, saan a dagus a nag-exam apaman a nakaturpos iti panagadal idi 2015 gapu iti agduduma a rason.
Segun ken ni Malenab, karaman kadagiti rason ket saan a nakasagana ti riknana nga ag-exam isu a nagpokus pay laeng iti trabahona a nakatulong kenkuana para iti ad-adu pay a kapadasanna.
Kalpasan iti siam a tawen manipod nagturpos ket idi kayatnan ti ag-exam, impadasna iti kaunaan a gundaway ket saanna nga impagarup a karaman kadagiti ag-topnotcher babaen ti 89.25% rating ta makapasa laeng ti kinalikagumanna.
Patien ni Malenab a ti kapadasan iti kasayaatan a mangisuro ti tao gapu ta ti trabahona ket mailinya iti inturposna a Bachelor of Science in Fisheries.
Iti agdama ket awan pay laeng ti plano ni Malenab nga umakar iti pagtrabahoan ta naragsak iti agdama a panggedanna ta isu ti nakatulong kenkuana idi mangmangrugi pay laeng ti karerana.
Balakadna kadagiti ag-exam para ti Fisheries Professional nga aramiden amin a kabaelanda tapno magun-od ti arapaapda a makapasa idinto a kadagiti saan a napagasatan ket saan a mapukawan ti namnama ta adda latta iti sumaruno a panag-exam a pagbawian.
VIDEO – KATRINA MALENAB
