VIGAN CITY – Naawat ni Ms. Amelyn Abella a Master Teacher II iti Ilocos Sur National High School iti regional Civil Service Commission Dangal ng Bayan Award iti napasamak a 2022 CSC Honor Awards Program idi September 28, 2022.
Iti pannaki-uman ti Bombo Radyo Vigan ken ni Ms. Abella, nalapaus ti ragsakna ta napagasatan wenno napili a regional winner iti nasao a pammadayaw.
Segun ken ni Ms. Abella, adda tallo a mabalinda a pakisalian nga isu iti Presidential Lingkod Bayan Award, CSC Pagasa Award ken Dangal ng Bayan Award ket ti Dangal ng Bayan Award iti nakisalianna.
Inlawlawagna a narigat iti nasao a pannakisalina ta adu iti proseso ken dumalanna ta manipod iti pannaka-endorsona iti pagadalan a pagisursurwanna ket mai-endorso pay iti Division office nga isu met iti mang-endorso iti CSC provincial ken maisarunon iti CSC regional.
Rumbeng laeng a maidatag amin nga accomplishments ti na-endorso karamanen dagiti supporting documents tapno isu ti pagrukodan para iti nasao a pannakaala iti award.
Kinunana pay a naragsak iti panagserbina nangruna nu adda iti pagbanagan ti sakripisyo ken panangtulongna iti padana kangrunaanen kadagiti estudyante.
