Naamoan kadagiti listaan a naala ni Senate President Chiz Escudero a nangatngato ti crime index idi panawen ni dati a President Rodrigo Duterte kumparar ita a Marcos Administration.
Mainaig dayta iti sarita dagiti testigo idi kalman iti panagdenggeg ti Senate Blue Ribbon Committee a bimmaba ti kriminalidad idi panawen nga adda war on drugs.
Segun ken ni Escudero, ti addang ket gapu iti panangsisinungbat dagiti naimbitaran a resource person.
Maibasar iti listaan a naala manipod Legislative Budget Research and Monitoring Office, manipod July 1, 2016 agingga April 21, 2018 ket 195,518 ti crime index idinto nga iti isu met la a panawen idi July 1, 2022 agingga April 21, 2024 ket umabot iti 71,544 ti crime index iti pagilian.
Nu ikumparar idi ket nangatngato ti 60% wenno arigna triple iti kangato ti krimen wenno dagiti pammapatay idi manarimaan ti drug war ngem iti agdama a panawen.
Karaman pay iti nangato a crime index dagiti kaso ti extrajudicial killings gapu ta krimen iti panagpatay uray nainaig ti illegal a droga wenno ania pay a krimen.
