VIGAN CITY – Awan ti kinaagpaysona a ti panang-cremate kadagiti matmatay gapu ti Covid19 idiay New Delhi, India ket mapuoran lattan kadagiti kalsada kas inlawlawag ni Bombo International Correspondent Reynaldo Calibuso a taga-Tampugo, Tagudin ngem adda ita iti nasao a pagilian para ti liver transplant ti anakda ken positiboda pay a sangapamiliaan isu a naka-quarantine da ita iti hotel.
Iti pannaki-uman ti Bombo Radyo Vigan ken ni Calibuso, adda ti maysa a lugar a pang-crematan da kadagiti bangkay ken agduma ti panang-cremate da kadagiti Kristiano a de -koriente ti wagasna idinto a dagiti Muslim ket mapuoran iti kayo ken dagiti mismo pamilia dagiti natayan ti mangpuor kadagiti pimmusay nga ay-ayatenda iti biag.
Inladawan ni Calibuso a nasukir dagiti Indian ta saanda a sumursurot iti protocol ken agkaiwara dagiti basurada iti waig kasta payen nga adu dagiti isaysayangkatda a piesta ken nageleksyonda pay isu a kimmaro ti sitwasyonda.
Malaksid ti dayta, pinasingkedanna nga yaleng-aleng laeng dagiti Indian ti Covid19 ta patienda a nalaka laeng a maagasan ken natalekda ta nabakunaandan kontra Covid isu nga isudan ti mangipampamuspusan a sumurot kadagiti pagannurotan tapno saanda a makaptan iti nasao a sakit.
