Naalarma ti Commission on Population and Development (CPD) iti panagngato ti panagsikog dagiti agtutubo, nagruna kadagiti agtawen iti sangapulo ket lima, a makaapektar saan laeng iti salun-atda no diket pati iti panagadalda.
Impaganetget ni CPD Planning, Monitoring, and Evaluation Division Chief Mylin Mirasol Quiray, a ti bilang dagiti rehistrado a live birth kadagiti agtutubo nga agtawen iti 0-14 ket ngimmato manipod tawen 2019 agingga tawen 2023.
Segun iti Philippine Statistics Authority (PSA), 150,138 ti bilang ti nagsikog nga agtutubo idi tawen 2022, a ti 3,135 kadakuada ket agtawen iti sangapulo ket lima idinto nga 142,275 ti bilang ti nagsikog nga agtutubo idi tawen 2023 a ti 3,343 kadakuada ket agtawen iti sangapulo ket lima.
Innalukoy ti komisyon ti lokal nga opisial nangnangruna dagiti Sangguniang Kabataan (SK), nga unaen dagiti programa a maipapan iti reproductive health tapno makatulong a masolbar ti umad-adu nga adolescent pregnancy ken mental health issue ta gagem a mapapigsa ti panagplano ti pamilia ken panagbalin a responsable a nagannak para iti nasaysayaat a kalidad ti panagbiag. – Augie Arellano
