VIGAN CITY – Emosyonal ni Gov. Ryan Singson iti isasangpet ken pannakairugi ti vaccination program kadagiti medical healthcare worker ditoy probinsia.
Segun ken ni Singson, linagipna ti naglabas a tawen a ti ammona ket nabiit lang a panawen nga agraira ti covid ngem gapu ta nagtultuloy ket dakkel a panagyamanna kadagiti healthcare worker iti anus ken sakripisyoda a mangtultulong iti provincial government tapno malapdan ti virus.
Maragsakan ni Singson iti isasangpet ti bakuna uray no adu ti mangbabbabalaw a Sinovac ti simmangpet ngem patienna nga uray ania a klase ti bakuna ti sumangpet ket saan a parikut ta ti napateg ket adda proteksyon dagiti umili.
Nupay kasta, inallukoy ti gobernador dagiti agdudua a healthcare worker a gundawayandan ti agpabakuna tapno adda proteksyonda nangruna ta isuda ti maysa kadagiti agkasapulan iti bakuna ta kanayonda a mai-expose kadagiti pasyente
Malaksid ti dayta, inlawlawagna a saan nga agmaymaysa a nangipatungpal iti health protocols ta katulunganna dagiti doctors ken covid19 task force a nagdesisyon para ti pagsyaatan dagiti umili.
