VIGAN CITY – Mangrugi inton December 1 ket nawayan ti sumrek iti Ilocos Sur ta saanen a kasapulan ti negatibo a resulta ti Covid19 test ken awanen ti quarantine protocols no la ketdi fully vaccinated.
Segun ken ni Gov. Ryan Singson, masapul laeng nga ipakita iti vaccination card kadagiti kayatna ti sumrek iti probinsia a fully vaccinated ngem no saan pay laeng a nabakunaan wenno first dose pay laeng ti naawat a bakuna ket dumalan latta iti 14-day quarantine ken masapul nga agpa-antigen test.
Ti nasao nga addang ket gapu ta bimmaban ti bilang dagiti aktibo a kaso ti Covid19 ken wagas tapno maallukoy dagiti umili a mabakunaan.
Inallukoy ti gobernador nga iti pannakayuswat ti National Vaccination Day inton November 29 agingga December 1 ket makipaset dagiti Ilocos Surian iti panagbakuna.
Iti agdama, mayur-uray ti guidelines iti nasao a pagannurotan manipud ti Ilocos Sur provincial government.
