VIGAN CITY – Ad-adalenen ti Ilocos Sur provincial government ti saanen a pannakai-require iti Covid test result kadagiti sumrek ditoy probinsia.
Dayta ket gapu ta adda tallopulo ket innem a probinsia ditoy pagilian ti saanen a dumawdawat iti aniaman a test kasakbayan a sumrek kadagiti probinsiada.
Segun ken ni Gov. Ryan Singson, masapul laeng nga in-inut nga aramiden tapno nasigsigurado ta masapul a maipangruna latta ti kinatalged ti amin.
October 17 idi in-inut a nairugi ti pannakapalukay ti restriksyon ditoy probinsia ta isu ti gundaway a naikkat ti RT-PCR test ket nasukatan ti Antigen a nalaklaka ken nadardaras a maala kas requirement iti iseserrek ditoy probinsia.
October 22 idi inadaptar ti probinsia ti pagannurotan ti IATF a dagti fully vaccinated nga umili ket dumalan laengen iti pito nga aldaw a quarantine kasta payen a dagiti quarantine protocol status kadagiti nadumaduma nga ili ket naibaba manipud ECQ, MECQ, GCQ with HR agingga itan a naisakupen ti probinsia iti GCQ.
Nupay kasta, nagyaman ti gobernador iti kooperasyon dagiti umili tapno mapababa dagiti kaso ti Covid19 ta nakurang laengen a sangaribo dagiti kaso.
