VIGAN CITY – Natalek ni Renalyn Dasalla Dacquel ti Barangay Luzong, Manabo, Abra nga adu a balitok a medalya iti maala ti kickboxing team ti Pilipinas a makisalip ti Southeast Asian Games a pormal a malukatan inton rabii idiay Philippine Arena, Bocaue, Bulacan.
Ni Dacquel ti maysa kadagiti kickboxing athlete a mangibagi ti Pilipinas iti nasao a regional biennial meet, kakadua na dagiti sabali pay a Cordilleran fighters.
Ti pannaki-uman ti Bombo Radyo Vigan ken ni Dacquel, nadakamat na a nakatulong kenkuana iti rigat a nariingan na idiay lugar da agsipud ta ubing pay laeng ket nairuwamen kadagiti nadadagsen a trabaho kas iti panagbagkat iti irik ken panagkayo idiay kabanbantayan.
Damo na pay laeng ni Dacquel iti makisalip iti nasao a regional biennial meet ngem natalek a makaala iti balitok a medalya iti kategorya na agsipud ta nainget iti panagsanay na, pakairamanan dagiti sabali pay a kadua na iti team idiay Cambodia ken Taiwan.
