Coordination ken monitoring kadagiti LGU ken local disaster units, pinaingetan ti NDRRMC gapu ti Bagyo Ramon

VIGAN CITY – Pinaingetan ti National Disaster Risk Reduction and Management Council (NDRRMC) iti pannakikinnammayet ken monitoring da kadagiti local government unit ditoy Northern Luzon, nangruna idiay Isabela- Cagayan area a kas paset iti panagsagsagana iti manamnama a panag-landfall ni Bagyo Ramon inton tingnga iti rabii wennu inton bigat.

Ti pannakiuman ti Bombo Radyo Vigan ken ni NDRRMC- Office of the Civil Defense spokesman Mark Timbal, nadakamat na nga arigna aggiddanen iti ar-aramiden dagiti concerned units a relief operations ken disaster preparedness idiay Isabela- Cagayan area nga immunan a dinuprak ni Bagyo Quiel nga itatta ket isu manen iti dupraken ni Bagyo Ramon.

Kagiddan iti dayta, inpasigurado ni Timbal a nakasagana ken makanay dagiti relief packs a maited kadagiti naapektaran iti napalabas a bagyo ken dagiti posible a maapektaran iti mapaspasungadan a bagyo.

Kiniddaw ti opisyal iti publiko a sumurot da kadagiti paka-ammo ken pakdaar ket agbakwit da nu kasapulan uray nu saan pay a nakaro iti epekto ni Bagyo Ramon tapnu saan da a maisagmak.