Idurduron ni Senador Sherwin Gatchalian ti panagembistigar ti Senado iti plano ti Social Security System (SSS) nga ingato ti kontribusion dagiti miembroda.
Segun kenni Gatchalian, nangipila isuna iti resolusion tapno maadal ti isyu ken tapno mangisayangkat ti oversight investigation ti Senate Committee on Banks.
Karaman kadagiti imbestigaranda ket ti liderato ti SSS gapu ta patienna nga adda problema iti administrasionna.
Kayat pay ti agpapanday-linteg ti agkiddaw iti panangilawlawag manipud iti SSS no apay a saanda pay a nakolekta ti nasurok a Php90 bilion nga utang dagiti delinquent employers.
Kinunana a daytoy ti rumbeng nga umuna a kolektaen ti SSS sakbay nga ingatoda iti kontribusion.
Karaman pay iti plano ni Gatchalian nga imbestigaran ket dagiti investments ti SSS a dagiti matgedan manipud iti daytoy ket rumbeng a maibayad kadagiti dadduma a benepisio dagiti miembro tapno saan a maingato ti kontribusion.
