VIGAN CITY – Nasarakan a natay ti maysa a lalaki iti manarimaan a kontruksyon iti Hospital Building iti University of Northern Philippines iti Tamag Vigan City.
Ti pimmusay ket ni Jayson Tubera Tiera, agtawen ti tallopulo ket lima, construction worker, naasawaan a tubo iti La Virgen, Badoc, Ilocos Norte ngem agdama nga agnanaed idiay Brgy. Dadalaguiten Sur, Sinait.
Maibasar iti insyal nga imbestigasyon iti pannakabagi ti linteg, napan ni Larry de Vera Templanza, agtawen ti uppat a pulo ket lima, naasawaan, construction worker nga agnaed met laeng idiay Brgy. Dadalaquiten iti ayan ni Tiera tapno riingenna itattay alas singko y media iti bigat ngem nakitana nga awanen iti biagna isu a nagpatulong kadagiti kameng iti UNP Hospital tapno marevive ngem naideklarar a pimmusay.
Nupay kasta ket pinasingkedan dagiti katrabahoanna nga agsagsagaba ti biktima iti Acute Coronary Syndrome wenno ACS ta idi kallabes ket na-revive met laeng gapu iti nasao a sakit.
