Nakemmeg ti maysa a construction worker gapu iti panagtakawna iti kuarta manipud iti cash register iti maysa nga inn idiay Barangay Margaay, Narvacan, Ilocos Sur.
Ti suspek ket agtawen iti duapulo ket siam, agnaed iti Barangay Ba-ug, San Juan, Abra.
Maibasar iti imbestigasion, nakangngeg ti caretaker iti uni a maluklukatan ti drawer iti front desk kabayatan ti kaaddana iti uneg ti establisimiento.
Idi kitaenna ti reception area, nadanonanna ti suspek iti sangwanan ti cash register.
Segun iti caretaker, napaspas nga innala ti suspek ti saan pay a masisinuo a gatad ti kuarta manipud iti cash register ken naglibas a dagus.
Kinamat ti caretaker ken ti kaanakanna ti suspek kagiddan ti panagpaarayatda kadagiti agindeg agingga a makemmeg daytoy dagiti opisial ti Barangay Margaay.
Dimteng dagiti pulis ket nakemmeg ti suspek ken sangwenna ti kaso a theft a maipila kontra kenkuana.
