VIGAN CITY – Kaso a panaglabsing ti Republic Act 9165 wenno Comprehensive Dangerous Drugs Act of 2002 iti sangwen ti suspek a ni Joseph Valdez, agtawen ti tallo pulo ket uppat, maysa a construction worker nga agnaed idiay Brgy. Gabor Norte a nakemmeg idi kalman.
Ti pannakakemmeg ti suspek ket babaen iti nagtipon a pwersa ti Sta Cruz Police Station, Ilocos Sur Provincial Intelligence Branch, Philippine Drug Enforcement Agency- Region 1 ken Regional Drug Enforcement Unit
Naala manipud ti suspek ti maysa a transparent heat sealed plastic sachet a naglaon ti maatap a shabu ken maysa a kaha ti sigarilyo a naglaon ti tallo a transparent heat sealed sachet ti mapapati a shabu nga agdagsen ti 0.26 a gramo nga aggatad ti dua ribo dua gasut a pisos; dua gasut a pisos a buy bust money, maysa a rolled aluminum foil, ken cellphone.
Ikoten ti Sta. Cruz Police Station ti suspek ken maisagsaganan ti kaso a sangwenna.
