VIGAN CITY- Pito a tama ti paltog iti bagi ken ulo ti nakatayan ni Emi Millare Rapisura , agtawen ti tallo pulo ket innem , addaan ti live-in partner, construction worker ken tubo ti Lagangilang,Abra ngem agnanaed idiay Caparacadan, Caoayan, gapu iti panangpaltog dagiti saan a nabigbig a suspek kabayatan a nakalugan iti tricycle idiay barangay Pandan, Caoayan.
Segun kenni Police Senior Inspector Frederico Artates, hepe ti Caoayan municipal police station, imimbestigaran da ti motibo ti krimen agsipud ta nadalus ti record ti biktima iti barangay da ngem naduktalan nga adda kaso na a murder idiay Abra ngem nawayawayaan idi September 2017 ta nagpyansa ket manipud idi, nagnaeden idiay Barangay Caparacadan.
Mainaig dayta, nagpatulong ti chief of police iti publiko tapno mabigbig dagiti suspek ta segun kadagiti nakakita ket nakaabbong ti rupa na ti suspek a nakalugan ti motorsiklo ket naala iti nakapasamakan ti krimen ti walo a basyo ti bala , ken maysa a deformed slug ti caliber 45.
Para met iti ina ti biktima a ni Ignacia Rapisura ket burburtiya pay laeng kadakuada ti rason iti pannakapapatay ti anak na ta awan ti ammo da a nakasinnubang ken naawat na a pangta ti biag.
Inaklon met ti live-in partner ti biktima a ni Erlyn Pablico a saanen nga intuloy ni rapisura ti nagat-atendar ti hearing idiay Abra para iti kaso na ta pagamkan na nga agpeggad ti biag na.
