VIGAN CITY – Maysa a construction worker iti nabagkong itattay bigat iti ili ti Sta. Maria.
Ti biktima a nadundunor ket ni Jun Jun Murao Garcia, agtawen ti duapulo ket innem, construction worker a tubo iti Quintarong Bangar, La Union ngem agdama nga agnaed iti Brgy. Bia-o, Sta. Maria ta binagkong iti namin-ano a daras ni Dante Espiritu Dasalla, agtawen ti duapulo ket tallo, baro, construction worker nga agnaed idiay Brgy. Lingsat iti nasao nga ili.
Naamwan a naki-inninom ti arak ti biktima ken suspek kadagiti dadduma pay a lallaki idi rabii ti August 18 idin bigla a pimmanaw ti suspek ket nagturong iti bagatan a direksyon ngem sinaruno ti biktima agingga a nakitana ti suspek nga agtugtugaw isu nga inallukoyna nga agsubli iti panaginomda ket napanda gimmatang iti dua pay a bote iti arak ken intuloyda iti naginom.
Kalpasan ti sumagmamano a minutos ket bigla lattan nga imbettak ti suspek ti bote ket inaramatna dayta a pinangbagkong ti biktima iti namin-ano a daras isu a timmaray ngem kinamat ti suspek agingga a binato na iti ulo ti biktima.
Nupay kasta ket nagsubli ti biktima iti barracks-da ket nakaturog gapu iti pannakabartekna isu nga iti oras ti alas otso itattay bigat ket nasarakan ti katrabahoanna a dara-dara a gappuanan ti panangipanda iti Ilocos Sur District Hospital Narvacan para iti pannakatamingna.
