VIGAN CITY – Natay ti maysa a lalaki ta mapapati a binagkong ti saan pay nabigbig a suspek idiay Brgy. Rosario, Cervantes, Ilocos Sur.
Ti biktima ket nabigbig a ni Arnold Del Rosario Bañez, agtawen ti limapulo, naasawaan, construction worker nga agnaed idiay Brgy. Concepcion, Cervantes.
Iti pannaki-uman ti Bombo Radyo Vigan ken ni PCapt. Gabriel Labrador, OIC iti Cervantes Municipal Police Station, bayat ti panaginana a nakaidda ti biktima iti kamposanto iti nasao nga ili ket adda ti maysa a lalaki a simmangpet a nangbagkong iti barukongna.
Segun ken ni Labrador, naglibas ti suspek kalpasan ti pammagkong idinto a nagpaarayat ti biktima kadagiti agindeg iti nasao a lugar a gappuanan iti panangipakaammoda kadagiti pannakabagi ti linteg.
Naipan iti ospital ti biktima para iti pannakatamingna ngem naipakammo a pimmusay idinto a naisayangkat iti hot pursuit operation para iti posible a pannakakemmeg ti nasao a suspek.
Kabayatanna, pinasingkedan pay ti asawa ti biktima nga awan iti nakariri ni Bañez sakbay iti pammagkong.
