Ngimmato iti P375-million ti nairekord a confidential expenses ti Office of the Vice President para iti tawen 2023, basar iti nairuar nga annual audit ti Commission on Audit (COA).
Triple ti ngimmatuanna no iyarig iti confidential expenses iti nasao nga opisina idi 2022, ken doble ti nagbalin a travel expenses ti OVP iti napalabas a tawen.
Iti financial statement ti OVP, ngimmato iti P42-million ti gastos iti biahe ti OVP idi 2023 no iyarig iti P20-Million idi tawen 2022.
Umabot iti P31.43 million iti nailatang iti local travels wenno biahe iti uneg ti pagilian a nangatngato ti 68.8% manipud iti P18.62-million idi 2022.
Limmobo pay iti P11.15 million iti gastos iti overseas travel ti OVP idi 2023 manipud iti P1.5-million idi tawen 2022.
Iti panangilawlawag ti OVP, saklaw ti local travel expenses ti gastos ti maikadua a presidente, immediate staff, Vice Presidential Security and Protection Group (VPSPG), kameng ti Special Projects Division, Satellite Offices, Disaster Operations Center, ken dadduma pay a division.
Karaman pay iti gastos iti overseas travel ti daily allowance ken dadduma pay a travel expenses para iti official foreign engagement ken dagiti event nga inatendaran ni VP Sara, VPSPG, ken dagiti official delegation.
