VIGAN CITY – Agim-imbestigar pay laeng dagiti kameng ti Cabugao municipal police station iti panagtakawan a napasamak iti compound ti Two Brother’s Grocery idiay Barangay Baclig, Cabugao a nakapukawan ti dua gasut a pisos.
Segun ken ni Police Captain Ramil Llarenas, hepe ti Cabugao municipal police station, naduktalan da Rosabel Quillo nga agtawen ti dua pulo ket tallo, balasang, sales and marketing associate kenni Gerlie Joyce Arios nga agtawen ti dua pulo ket tallo, balasang, reservation officer nga agpada nga agnaed idiay Barangay Sagayaden, Cabugao a napursaran a nalukatan iti drawer a nakaikabilan ti dua gasut a pisos.
Malaksid iti dayta, napursaran pay a nalukatan iti stock room iti pasdek nga isu iti ayan ti drawer a nakaikabilan iti nasao a gatad.
Kabayatanna, inpakaammo met ni Gayle Jouen Remulacio nga agtawen ti dua pulo ket pito, manager ti MIDSCYR travel and tours nga agnaed idiay Pug-os, Sinait nga idi linukatan na ti JRCS Pharmacy nga adda iti uneg ti nasao a compound ket naduktalan na a napursaran a nalukatan iti akin-likudan a ruwangan iti pharmacy ken napukaw iti sumurok- kumurang sangapulo ribo a pisos a nagyan iti pouch bag a naikabil iti drawer da.
