VIGAN CITY – Pinasingkedan ni Commission on Human Rights Spokesperson Atty. Jacqueline De Guia a no man pay kasapulan ti nainget ti pannakaipatungpal ti enhanced community quarantine ket rumbeng a suroten latta met dagiti kameng ti Philippine National Police dagiti pagannurotan tapno maliklikan ti COVID19.
Segun kenni De Guia, kasapulan a maiyannatup iti linteg ti panangtiliwda kadagiti aglabsing ken adda ti access ti abogado kasta payen ti panangsurot iti social distancing no mainaig iti panangkemmegda sa rumbeng a kitaenda a naimbag dagiti pannusa nga ipakatda kadakuada ta isingsingasingna nga ag-community service da laengen imbes a maibaludda ta mabalin a mangpakaro laeng ti sitwasyon ti COVID19.
Malaksid iti dayta, kuna ni De Guia a parikut met laeng dagiti pasdek a maaramat a pagbaludan pakairamananen dagiti taraon para kadakuada isu nga anamonganna ti pannakawayawaya dagiti balud nga addaan iti nalalag-an laeng a kaso tapno saanda nga agdidinnupudop ken tapno saan a narisgo para kadagiti dadduma pay a balud.
Kasta met a kinuna ni De Guia a saan laeng idiay Correctional Institution for Women ti imonmonitor da nu diket ti amin a pagbaludan ditoy pagilian ken kasta met nga ububren ti amin ti parte ti Commission on Human Rights tapno maipadanun dagiti request wenno reklamo dagiti tattao.
