Inrusat ti Commission on Elections (COMELEC) ti digital platform a mangipalubos iti online filing para ti statement of contributions and expenditures (SOCEs) para kadagiti local ken national candidates.
Segun ken ni COMELEC Chairman George Garcia, ti Project SURI ket maysa a web application a mangipalubos iti digitalization ti panangipasa iti SOCE.
Ti proyekto ket pinondoan ti Japanase government iti ¥234 Million wenno P91 Million ken agbalinto a paset ti panagsagana para iti eleksiyon ti Bangsamoro.
Addaan pagpilian dagiti kandidato no ania ti kayatda a wagas tapnu maidatagda dagiti SOCEs-da – babaen ti online wenno hard copy.
Dagiti kandidato a saan a makaipasa iti SOCE ket makasoan iti administrative offense ken agmueltada iti P1,000 agingga P30,000 basar iti desisyon ti poll body, malaksid kadagiti barangay level aspirants.
Mabalin met a malapdan iti panagtakem dagiti nangabak a kandidato wenno partido political no saanda nga agidatag kadagiti SOCEs-da.
