Nakitinnulong ti Commission on Elections iti Bureau of Internal Revenue tapno mabantayan ti gastos ken panagbayad iti buwis dagiti celebrity ken social media influencers a naala para iti election endorsements.
Inlawlawag ni Comelec Chairman George Erwin Garcia a kayatda a mapabileg ti relasyon iti BIR tapno awan ti makalisi iti panagbayad ti tax nangruna ti SOCE.
Innayonna a masapul a makikammayet iti ahensia mainaig iti panangbantay iti statements of contribution and expenses dagiti kandidato ken political parties nangruna iti panangbayad kadagiti celebrities ken influencers a nangiyendorso kadakuada para iti 2025 Elections.
Iti MOA iti nagbaetan ti Comelec ken BIR, kinuna ni Garcia nga adda ti nasaysayaat a pannakabantay ti SOCE ken posible a tax evasion.
Makasoan iti administrative offense ken mamuelta manipud P1,000-P3,000 dagiti kandidato a saan a makaipila iti SOCE iti panagdesisyon ti poll body nga adda exemption kadagiti agpaidasig iti barangay level.
