Inamin ti Commission on Elections (COMELEC) a posible a saan a matuloy inton October 13 ti Bangsamoro Parliamentary Elections kalpasan a nangiruar ti temporary restraining order ti Korte Suprema kontra iti Bangsamoro Autonomous Act 77.
Segun ken ni COMELEC Chairman George Erwin Garcia, “legally ken factually impossible” a maisayangkat ti eleksyon ta saan nga umanay ti panawen para iti panagsagana pakairamanan ti voter’s education kadagiti lima a probinsia iti Bangsamoro.
Innayon ni Garcia a nu ipilit iti eleksyon nga awan iti nalawag a linteg a masurot, posible a maideklarar nga awan ti bileg ti resulta isu nga ad-adalen ti komisyon nu maisanud iti eleksyon kasaruno ti Section 5 iti Omnibus Election Code.
Mapatta-patta nga umabot iti P774 million iti kasapulan ti komisyon nu kas bilang maituloy ti eleksyon apaman nga ikkaten ti Korte Suprema ti temporary restraining order.
Manamnama a mangiruar ti pormal a desisyon ti poll body maipanggep ti nasao a banag inton sumaruno a lawas.
