VIGAN CITY – Inruaren ti Commission on Elections ti calendar of activities para ti 2025 mid-term national ken local elections.
Iti salinong ti Resolution No. 10999, intuding ti Comelec en banc ti election period manipod January 12 agingga June 11, 2025.
Bayat ti nasao a kanito ket maiyetnag ti gun ban iti intero a pagilian.
Ti 90-day campaign period para ti national candidates para ti senador ken party-list ket mangrugi inton February 11 agingga May 10 inton sumaruno a tawen.
Segun ti Comelec, dagiti local candidates ket uppat a pulo ket lima nga aldaw ti panagkampaniada a mangrugi inton March 28 agingga May 10.
Ti voting period para ti Filipino overseas ket naituding manipod Aril 13 agingga May 12 idinto a ti local absentee voting ket manipod April 28 agingga 30.
Mabalin nga agipila ti dagiti kumandidato ti national ken local ti certificate of candidacy manipod October 1 agingga 8.
Iti isu met la a panawen ket mabalin payen nga agipla dagiti party-list group ti Certificates of Nomination and Acceptance of Nomination.
Dagiti met substitute candidates ket agingga October 8 iti panangipilada ti Certificate of Candidacy-da.
Kabayatanna, ti mid-term election ket nakaituding inton May 12, 2025.
