Naituding a maipatungpal ti naing-inget a pagannurotan iti campaign materials iti salinong ti “Operation Baklas” iti panangrugi ti opisial a campaign period dagiti national candidates inton February 11, 2025.
Inyunay-unay ni Comelec Chairman George Garcia a dagiti local Comelec offices ket aktibo a mangikkat kadagiti campaign material a saan a sumursurot iti limitasyon ti rukod wenno ti panagipaskil kadagiti saan nga otorisado a public spaces.
Mangipatungpal pay ti Comelec iti naing-inget nga addang kontra iti panaggatang ken panagilako iti botos.
Segun iti Comelec, mabalin nga agireport dagiti umili kadagiti insidente -karaman dagiti ladawan wenno video iti Committee on Kontra Bigay.
Dua nga aldaw sakbay ti campaign period para iti 2025 midterm elections, immapela pay ti Comelec kadagiti aspirant nga agaramatda kadagiti campaign material a biodegradable tapno masalwadan ti environment.
Nangbukel ti poll body iti committee on environmentally sustainable elections tapno ipromote ti panagaramat ti environmental-friendly campaign materials.
Nagballaag ni Garcia nga aramaten ti Comelec ti existing policies tapno agipila iti kaso kontra kadagiti kandidato a mangdadael iti aglawlaw iti inda panagkampanya.
Naituding ti 90-day campaign period para iti national candidates inton Martes, February 11 agingga inton Mayo 10.
Ti met 45-day campaign period para kadagiti local candidates ket inton March 28 agingga May 10.
